ما بين رملك
وبين طينك
تئن الهمزه ف أنايا
وبين حقك وتأويلك
تتوه البسمه ف سمايا
وبين الصبر ف الملكوت
ألاقى الكف ف رحايا
وبصبر حبه و استنى تكونى الزاد من الترحال
وبتمنى
الاقى توهة الموال ف تدويره على المعنى
والاقى الموج بيضحكلى ويرسملى الكلام ف الايد
وبستنى
يدور كونك
يدور كونى
وكونى ف العلام استاذ
فبتهجى قراية اسمك المكتوب
على شراع السما السابعه
ويدلى كما العناقيد
وأفك رموز حواديتك
ويوم استنى تقوليلى: بتنطق اسمى بسهوله
دا يوم عيدى ويوم عيدك
وبتوضى بخمره من كاسات ليلك
واصليلك
وبدعيلك
الاقى الفرح والترياق ف لون نيلك
واصل النيل بينزل من بلاد السمر
من النوبه
بلاد الاصل ق الموال
والموال
بيتعكز بضل ايزيس
وبيسبح مع الهرمين
وسايب خوفو يدروش بشمس اتون
وصوت دينك
فيتلاقى المعنى والموال
ويطرح فى خضار السطر
صوت المغنى بالمزمار
يرقصلى سمار عودك
ويتحنى
بعشق اسكندر الممسوس بمواعيدك
ويتغنى
بترنيمة التطويب
واخر كلمه من ادان الفجر
هذا النص وهذا النشاط المستمر يدل على أنك تمر بفترة خصبة تحتاج أن تستغلها بإصرار
ردحذفهذا النص وهذا النشاط يدل على أنك تمر بفترة توهج
ردحذفتحتاج إلى أن تستغلها بصورة تغير من نظرتك لنفسك وللآخرين