السبت، 11 يونيو 2011

صلاه



اقراء فاتحه الكتاب

وبعض تراتيل بابويه

وطلسمين

فرعوني

...واشوري

واصلي علي كثير

لابداء تدوين الحياه الحياه كما اريد

بقلم ...

ومسبحة ...

وكتاب

سلم وصول لليقين

بغير خطيب ولا اعتراف اقول :

نون ..

عين .

.سين

فلا حروف كما اقول او اشير

والفقراء احبابي

لا تختبر الشيطان...

فهو رفيق درب الانبياء

واختبر اباك النائم في العراء

واسأل التي تمزق شعرهها الفضي

لتربط مابين روما

وملعب البيسبول في بلاد الرعاه

واخرج من حدود الخوف في نفسي

وفتش فينا عن كسل العباد في الخلوات

_ انا لا اشير_

وهذا الضد يكتبني

يأخذني من الاشباه

للتوحد بالحروف

_ وانا براء مما اقول_

تختلف الحروف والمعاني بالمجاز

فقد تصبح القصيدة يوم

دموية حمراء

وقد يصير نعي جاري النازي بالجريده اخضر

وقد تصبح ايات الله في الصحائف شفافة بيضاء

صوفيون في جب يوسف والخوف يؤنسنا

فلا اسطورة التنجيم تنقذنا

ولا امرأة العزيز تضمني اذا نجوت

وأحب الانثي بصورتها الاولية كما حلمت ....

عد من الابحار في نفسك:

تذكرني مفكرتي الالكترونيه

بأن

طعام عبيد الجوع صار طازجا

وشيطان الشعر لايهرب بالصلوات

السبت، 4 ديسمبر 2010

شهقة موت



قالع اسمي

وسامع صوت الحلم بطيشه

لامم كل الضلمه ف ليلي

وساكك شيشه

مش لازم اسمي يكون

علان

ولا اسمك يبقي

دي بنت فلان

دا الواد القمحي لما يحبك

مش هيقلك

ان اللمعه ف عينك ديه

هتعمل كام

وان شاف الخوف سايل من جفنك

مش هيحاسبك

ان الحضن بتاعه يساوي زمان

ملعونه الصوره المرسومه

ومفهاش من ملامحها حاجات

ملعون الرقم اللي بيخلق جوايا شيطان

مش قادر احبك

ولا قادر افرد ايد

تستني ايديكي

ولا عارف حتي اشد بحيل الليل

شهقتي لعينيكي

يخرب بيت الدنيا الخايبه

والطبقيه الخاربه قلوبنا

من كام سنه

والحلم لساه حلم

ونقش الحنه ف كفوفي

لساه كاتب الاسمين

من كام سنه

والنور بيتعالي يعشش معايا ف ضل

من كام سنه

والشرخ ف برواز البكره

عمال بيزيد

مش عاوز اكون الواد الجامد ابو 4*4

ولا هعرف ابقي ابو كرش خليجي

لكن

حيلتي من الملايين

حنيه ف قلبي

وعاشق زي حكاوي الليل

بنت السلطان

ومعادش ف ايدي

غير الحلم الناشر طيفه

ولا عادش ف ايدك

غير انك متجيش الحلم

ولا تشوفيهوش



الأربعاء، 13 أكتوبر 2010

هزليه عصريه




حدس
وقد حدث
عبث بالاشياء وبالعقول
ضرب بالثوابت عرض حوائط
بحثا عن حقيقة
او سؤال
غنيت مع الحداثيين اغنية الجديد
وقرأت للاصوليين اشعارا من ثمود
وبحثت عن الانسان عند مرفأ الوجوديين
ليهبط وحي كليوباترا _تمثالا من الاسفلت-
معلنا عن عقل سائح تقوده
ازرار من جليد
_انا هنا_
في اللا قواعد
عابس
او عابث
او ناشر لارواح الخنا
ولربما كنت ناسكا
فقط لاحرم الاشياء
احفر للنعام خندقا
اعد حساء غزالة للذئب
اشرب نبيذ ا يهوذي نكهته
واكتب شعرا للاله يقول:
(فضولية الاشياء قاتلة _كخصوصية الناي حين يكتمل النشيج)
يكفيني سرقة رمانة من الحديقة
لا شراؤها
او اقتناص براءة
من عيون جنين
او
تسمية البلاد بما تجيد
فأنتمي لسجن يوسف من بعيد
فأنا لبلابة تسلقت فوق جدارية الدرويش
فهويت مغشي الفؤاد بلا نظر
(انا من رأي)
يقول مضطرا لمن يبول بطهره
_امين_
ولو كنت حيا
لقرأت سفرا
واوقدت للعذراء شمعا
و صليت ركتين
ثم عدت للموت
قبل انقضاء ساعة عطلتي
فأسجل في دفتر الموتى
_زائر_
(انا من رأي)
ولمن لم يري
فالينظر من خلف عدساتي عله
يبصر
او يكاشف
اويري

الأحد، 20 يونيو 2010

ايزيس

ملايتك الملفوفه فوق خصرك
رنة خلخالك الفضه
طيبه سواد الليل جوه العيون
دايما يقولوا اني ولي......
رقصه خلاصك ف الحضور
وسقوط عباده الاوليا
ساعة عزوف الناي عن الانشاد...شايلينك المريدين
عشان تقري اني ولي
ف الاعتراف شبه الخلاص
لحظة ما أطير من غير خيال
و العقل زاهد سكرته... بيقول خلاص
شيل الصليب مبقاش خطيه ف قلبنا

(2)
فتغزل ف عيون البنت اللى بتحلم
بكوباية حمص ويايافوق قصر النيل
وتعلق كل المسموح م الدنيا
بقنديلي القايد ف عيونها.. وبشراع الليل
بتحب الفضه المشغوله
ونفسها ف البرقع متخرز ب(طسم)
(3)
السوس بينخور ف عصايتي
و الكرسي العالي ما هوش راسي
ف عنيا الوجد اللي ماليني
وحلولك فيا ما هوش مسموح
(4)
مرسوم ع اللوح اللي منور
سراجي المتعلق بملايتك
والسبحه الخضرا ...المنسيه...
منقوش ف الصفحه اللي وراها
نقصان الضلع اللي ف حضني ...مش بس فراغ
(5)
ملايتك الملفوفه فوق خصرك
رنة خلخالك الفضه
طيبه سواد الليل جوه العيون
ليه لسه بيطوفو... وانت الولي



__________________________
__________________

الخميس، 8 أبريل 2010

ترنيمة



ترنيمة ليل و بتزلزل سجون الكلمة في ضلوعي

و من نوحي

بينعي الناي بأوجاعه وأتباعه

يقويني بتابوت صمتي

فيرسم بسمة دبلانة و حيرانة

يتوه حزني لون حلمي وأتوه في الصمت وياهم

جريدة نخل محنية وكاسر صلبها رباطه

فنتلاقى

بكحل عيون غجرية و مشتاقة

تحني بالزمن كفي

وترسم نورها فوق خدين

واهو شارب سمار الطين

فبيكفي

عجوز بتنادى ف العتمة

تقول الصبر موالي

بتضرب بالودع في الرمل

توشوشني

تقول حكايتنا سهراية

تجمعنا وتحكيلنا

وتزرع كلمة ف الصخرة

وتندهلي

فدوس ع التوت برجليا

ويكمل ضلع كان ناقص

وطارح حلم يتهادى .. بصبْح نهار

وراسم شمس فرحانة .. بلون صبَار

عيال وبترسى مركبهم

ف حضن عجوز وفرحانة

حروف مكتوبة بالفضة

وشيخ درويش على كتافه بيرسم لوح

ودير صلبانه مرفوعه سفينة نوح

يردو صباها في الشيبة

تقول للواد

ترنيمة ليل و بتزلزل سجون الكلمة في ضلوعي

الأربعاء، 31 مارس 2010

كلام فارغ


مكانتش مصادفه

ان لقانا الاول ويا البحر كان وقت الجزر

وان قدومك كان ع البحر

دا جابله الجزر

وان سيجاره مابين شفايفنا

كات هي دفانا ف عز البرد

وحلمك بيا ويا قزازه الواين الاحمر

مكانتش هزار

لا دا بجد

وان المطر الرافض ينزل

خايف يرمي طهارته ف ارض

فيطرح بيها الشوك مش ورد

وان قماش مربوط على شعرك

مش هيعفك

وان كلام تقوليه من شعرك

مش هيضرك

دا انتي بيجري ف قلب وريدك جن يهد ك

فكان لازم اسيبك او تسيبيني

معادش في فرق

زي الجنه الزايفه بتاعتك

شرابها عجيب وسراب فيه ميه

بس الاعجب ان الميه

ان الميه بتاعتك انت مية زم

وبرغم العشق الثاير جوه ف قلبي

ذنبي انا كله

انى عشقت البت اياها ام عيار فالت

دا الناس قالت

وادي مشكلتي اياها معاها

ان انا راجل

وكمان متربي

وانى بخاف من ربى بجد

السبت، 20 مارس 2010

عنخ


ما بين رملك

وبين طينك

تئن الهمزه ف أنايا

وبين حقك وتأويلك

تتوه البسمه ف سمايا

وبين الصبر ف الملكوت

ألاقى الكف ف رحايا

وبصبر حبه و استنى تكونى الزاد من الترحال

وبتمنى

الاقى توهة الموال ف تدويره على المعنى

والاقى الموج بيضحكلى ويرسملى الكلام ف الايد

وبستنى

يدور كونك

يدور كونى

وكونى ف العلام استاذ

فبتهجى قراية اسمك المكتوب

على شراع السما السابعه

ويدلى كما العناقيد

وأفك رموز حواديتك

ويوم استنى تقوليلى: بتنطق اسمى بسهوله

دا يوم عيدى ويوم عيدك

وبتوضى بخمره من كاسات ليلك

واصليلك

وبدعيلك

الاقى الفرح والترياق ف لون نيلك

واصل النيل بينزل من بلاد السمر

من النوبه

بلاد الاصل ق الموال

والموال

بيتعكز بضل ايزيس

وبيسبح مع الهرمين

وسايب خوفو يدروش بشمس اتون

وصوت دينك

فيتلاقى المعنى والموال

ويطرح فى خضار السطر

صوت المغنى بالمزمار

يرقصلى سمار عودك

ويتحنى

بعشق اسكندر الممسوس بمواعيدك

ويتغنى

بترنيمة التطويب

واخر كلمه من ادان الفجر

فيدعيلى ويدعيلك

الاثنين، 4 يناير 2010

طراطيش


هلبس حلمي ف جزمة عمري ....

وأحاول أعيش ...
وأنوي أتدفا بشال اليوم الجاي ..
لكن ميجيش ...
وأقتل شهوة أب ف قلبي...
عشان معاييش ...
وأعلق عقد الوحدة ف صدري ...
وأقول طراطيش ...
وأما أسمع صوتك يهرب عني شيطان اليأس ...
وأقول أنا اسمك ...
فيبقى معايا زارات درويش ...
أو أبص ف عينك
ألقى الضحكة ف صوت العود..
ما تسيبنيش ...
يمكن يحصل بس أكيد ...
إنك غالية ...
وعمره ما ييجي اليوم الأغبر ..
تبقي مفيش ..
هلبس تاني البدلة الزرقا ..
وأحفر تاني قنال من بكره


* * * * * *
مش راح اقول انك سما ...
ف عيون ولاد متقسمة ...
ولا راح اقول انك سحاب ..
يروي سواد ليلي هنا ...
انا راح اقول انك وشوش ..
ضاحكة ..
عابسة ...
مغبرة ..
بس الوشوش تقدر تقول مليون سنة ...
يمكن أنا ..
جايز في بكرة تاني من هنا ...
يمكن وشوشنا تنالها نظرة من السما ...
واقدر اعيش ...
وييجي البكرة أو مايجيش ...
هفضل أكتب
وأقول ...
طراطيش !
ـــــــــــــــــــــــــــــــــــــــــــــــــــــــــــــــــــــ
محمد شاهين
يناير 2010