أيوب..

وعشان مقدرش أكون أيوب ...
ولا عارف أكون إبليس ...
شربت المر بالكيلة ...
عشقت الهم والحيرة ....
وحتى رضيت أبات مغلوب ...


عشان أبويا مات غرقان ...
وواد عمي دا تحت الطوب ...
عشان يدي قطعوها وأنا المسلوب ...
لبست توب العفاف ...
لقيت معنى الشرف متقوب ..


وقلت اصبر لقيت الصبر مش راضي ...
وايه يمكن وانا جوايا بقى فاضي ...

جربت أكون أنا نفسي لقيت القصة مش رايقة ..
جربت أكون واحد غيري لقيتها ف غيري مش لايقة ...

بقيت مطرود وانا عشقك بيجري دم ف عروقي ...
بيجري ف نيل ..
شراعه طويل ..
يعافر ويا نور الشمس ..
وساعة يوصل ... يلقي الليل ...

تعبت معاكي يا بلادي وتاهت وياكي المقادير ...
مدي اليد ... شقي الصدر ... تلقي القلب كله عويل ...
يصرخ جوايا وينادي ... مررت الحلق بالمشاوير ...
يسأل أهرامي وأجدادي ... فينك يا مايا م التصاوير ...


فين أبويا وجدي وإعمامي ... قتلهم صبر عمره طويل ...

شلت كتير ف حمل تقيل ... لحد ما انقسم ضهري ...
ومتوعدنيش بعد ما أموت ... هتاجي تطيبي خاطري ...

عشان مقدرش أكون أيوب ..
ولا لاقي ف يدي سيوف ..
ف وسط جبال وأنا مرمي .. كلاب تعوي ... ديابة خوف ..
ولا شايف غير الجلاد لمد الشوف ...

خلاص هصرخ ..
عشان الناس بقم نايمين .. ومش حاسين ...
ولا فارق معاهم ندل ... من اللي اصله راجل زين ...

عشان مقدرش أقول أيوب ...

ــــــــــــــــــــــــــــــــــــــــــــــــــــــــــــــــــــــــــــــــــــــــــــــ

محمد شاهين 10 / 1/ 2009 م